Նախաիմպլանտացիոն թեստավորում. morevmankan.am

Նախաիմպլանտացիոն գենետիկ թեստավորումը (ՆԳԹ, PGT) հնարավորություն է տալիս նախքան իմպլանտացիան ուսումնասիրել էմբրիոնի գեները և քրոմոսոմները: Այս թեստավորումը ցուցված է այն զույգերին, որոնց մոտ նախկինում եղել է կրկնվող անհաջող իմպլանտացիաներ, հղիության բազմակի ընդհատում և երբ կինը 37 տարեկանն անց է: Այդ ամենի պատճառը կարող է լինել էմբրիոնների քրոմոսոմային անառողջ վիճակը:

ՆԳԹ-ն ցուցված է նաև, եթե զույգերից մեկի մոտ կա քրոմոսոմային մուտացիա, կամ ընտանիքներում դիտվել են գենետիկ հիվանդություններ:

Նախաիմպլանտացիոն գենետիկ թեստավորումն օգնում է կրճատել արհեստական բեղմնավորման անհաջող փորձերը, ԱՄԲ-ի ժամանակ ընդհատվող հղիությունների քանակը և բարձրացնել հղիանալու հնարավորությունը:

ՆԳԹ տեսակները

Նախաիմպլանտացիոն գենետիկ մոնոգենային թեստավորում (ՆԳՄ Թ)․ նախկինում հայտնի էր որպես նախաիմպլանտացիոն գենետիկ ախտորոշում: Այն ուսումնասիրում է էմբրիոնները՝ կոնկրետ գենետիկ հիվանդության վերաբերյալ, պարզում էմբրիոնի՝ այդ հիվանդության հիվանդ կամ կրող լինելը:

Անեուպլոդների (երբ օրգանիզմի բջիջները պարունակում են փոփոխված թվով քրոմոսոմներ, որոնք չեն բազմապատկվում հապլոիդ թվից) նախաիմպլանտացիոն գենետիկ թեստավորում (ԱՆԳ Թ)․ նախկինում հայտնի էր որպես նախաիմպլանտացիոն գենետիկ սքրինինգ, որի ժամանակ հետազոտվում են էմբրիոնի քրոմոսոմները՝ նրանց մուտացիաները բացառելու կամ հայտնաբերելու համար: Արգանդի խոռոչում տեղադրվում են միայն քրոմոսոմային առումով առողջ էմբրիոնները:

Կառուցվածքային խանգարումների նախաիմպլանտացիոն գենետիկ թեստավորում (ԿԽՆԳ Թ)․ թույլ է տալիս հայտնաբերել քրոմոսոմների կառուցվածքային խանգարումներն այն դեպքերում, երբ ծնողներին հայտնի են մեկ կամ մի քանի քրոմոսոմների անոմալիաները (քրոմոսոմների պատռվածք կամ սեգմենտների ոչ ճիշտ միացում՝ տրանսլոկացիա, դելեցիա, դուպլիկացիա):

Ինչպե՞ս է իրականացվում էմբրիոնների ախտորոշումը

Վերոնշյալ հետազոտությունների համար  անհրաժեշտ է իրականացնել մոտավորապես 5-6 օրական էմբրիոնների 5-10 բջիջների (բլաստոցիստների)  բիոպսիա: Բջիջները վերցվում են լազերի օգնությամբ բլաստոցիստների արտաքին թաղանթից (տրոֆէկտոդերմ):  Վերցված բջիջներն ուղարկվում են գենետիկ լաբորատորիա հետազոտության:

Նախապես էմբրիոնները սառեցվում են: Նոր ցիկլում տրանսպլանտացիա չի կատարվում: Թեստավորման արդյունքները ստացվում են 5-4 շաբաթում:

Հարցեր, պատասխաններ, մեկնաբանություններ